Pikkewyn

Pikkewyn

nonnetjies
wiegelwaggel sedig langsmekaar
koppe saam in skindergesprek
‘n monnik mediteer
sedig
onder ‘n koeltestruik
donstieners
nog pik nog wyn
soek onseker na ‘n staanplek
in die son
viswinners duik
vlugvinnig
blinkend
tussen flarde seebamboes
en eenkant lê
‘n uitskop-eier

as dit snags buite kriek...

as dit snags buite kriek....

in die donkerte
wat stil om my vou
lê ek toe-oog
en luister na my siel
woorde begin blom
en tros saam in versies
wat ek soos blou forget-me-notsmoet pluk
en droogpers
op papier
　

Mis

Mis

die digte oggendmis
lê vanoggend
vlak
by my voordeur
ek hoor iewers naby
die tarentaal se skel

ek ruik die spoor
van die ebgety
niks
is sig- of tasbaar nie
maar ek weet
teen tienuur sal die son weer skyn
ek sal weer alles
duidelik
onderskei

Naggeluide

Naggeluide

dis halfdrie na middernag
iewers in die huis tik
die horlosie
eentonig ure af
‘n deur ratel liggies teen die kosyn
en die windklok klingel
sy eie melodie
voor by die deur
in die nagtuin vlak by my venster
kriek twee amoreuse krieke
in morsekode
hul liefde vir mekaar
en voor op die strandduin
skel ‘n kiewiet
onthuts
op sy nagtelike terrein
‘n nagmot klap-klap teen die straatlig vas
veraf ruis die see
soos in ‘n skulp hier dig teen my oor
‘n hond in die townshipblaf aanhoudend
en die blitspatrollie-sirene
skrei deur die nagstilte
op die deurpad verby
dan is dit dagbreek
en die muezzin roep
Allah

Vaalvink

Vaalvink
geelvink speelvink
vlytig vlegtend
vryvink
gretig
afwagtend
vaalvink vrouvink
pluk onvergenoegd
weer alles uitmekaar
laat triomfantelik
elke grassie takkie blaar
fladder na
benee
　

Kiewiet

Kiewiet
　
jy verwilder my
venynig
met jou kamikaze-swiep
en skel
skerp
skril
as ek te naby kom

is dit omdat jy hinkbeen
seer
en alleen is
of omdat jy jou klein terrein
wil koester en beskerm

dalk voel jy bedreig
en vrees
ek trap jou hoop en drome
stukkend
of is dit bloot
omdat jou wêreld swart en wit is
en myne in kleur

Vlieër

Vlieër

in die lokval van die wind
dans en tol my vlieër
grynslaggend
uitdagend met swiepende stert
hoog
bokant ons klein stippels op die strand
dan ruk hy moedswillig
uit protes
aan sy dubbelanker
wil hoër
sterker
verder
op die wind
in triomfantelike vlug
tot die verste draai
wanneer droom
weer terugswenk
tot realiteit
en wanneer ek hom dan
afwaarts
terugtrek
teen die speling van die wind
en netjies inkatrol
swig hy
vlak
by die ystervoete van my rystoel

Proksie

Proksie

ek weet nou-al
dat skemer oor die skiereiland
saans
net nóg
‘n glansende sonsondergang
sal vervang
seestrome in die baai
sal steeds saamvloei
in skakerings blou
die kiewiet sal weer snags skel
en die suidoos nog kom lamenteer
ja
die trop tarentaal
sal slakke uitskrop in my voortuin
maar ek weet noual
ek sal nie meer
die oggendwasigheid sien
of laatsomer se middaggloed ontbeer
sal ek dit alles mis
as ek weg is
nee
wag
ek het ‘n plan
jy sal mos agterbly
ek gee jou proksie
om vir my part
voort te leef
en nog ‘n dag aan te gryp

Wingerd

Wingerd

elke villa het sy wingerd
waarvan die waarde
blou
soos trosse korrels
hang
volryp soet of suur
net reg
vir die pluk daarvan

Alomteenwoordigheid

Alomteenwoordigheid

ek sal jou herken
orals
op bekende plekkies
elke somersdag weer spore trap
op die nat sand
in die lag van my ligte luim
hoor ek jy eggo
terug
dan is jou hand in die streling
van die seebries
oor my wang
jou waarde in die aand
se skemerglans
en jou vingerafdruk
op die maan
ek hoor jou
sentiment
in die klank van ‘n bekende melodie
ek sien jou op elke bladsy
van my lewensboek
aan ‘n geliefkoosde kussing
en in die geur van ‘n gereg
ruik ek steeds
jou nabye teenwoordigheid

'n Versie oor 'n kersie

'n Versie oor 'n Kersie

heelbo

hoog

hang die rooiste soetste

kersieklos

hy stut die trapleer

teen die dikstam vas

rek

en strek

en toe

karplaks

sien jy net sporte van die leer

en stof

arms en bene

voete en tekkies

lê deurmekaar gesloeg

onder die afgebreekte tak

met die mooiste rooiste kersieklos

Somer innie Kaap

Somer innie Kaap

‘n suidoos heraldeer
die aantree van die somer
aromas van varsgesnyde gras
en die soutbries van die see
prikkel my neus
voor my lê die see
saggroen en wit vandag
en om die Kom vou berge
deinsigblou
‘n kroos van vyftien tarentaaltjies
skarrel en skrop in my voortuin
en kies dan koers
na skuiling in die melkhoutbos
in die verbyry
op pad na die Eikestad
merk ek
‘n skaar aarbeiplukkers gebukkend op ‘n ry
tussen voëlverskrikkers
en by Bitterbessie-kwekery se afdraaipad
kreun ‘n trokvol blomme
kleurvol die grootpad in
pretdag-drawwers
sukkel swetend
op- en afdraand uit
gespikkelde bosduiwe wei
tussen soetigheid
wat die pers jakaranda
mildelik uitstort
in Stellenbosch se Van Riebeeckstraat
tannies met wandelstokke
toeriste en studente
stap langs koel eikelanings
ek hoor Adeste Fidelessag in die agtergrond
by die gemeentelike kersmark
kies ek uit rakke vol talent
‘n engel van fynbos
vir die eerste kersboom
van ons kleinkinnerkind

Floribunda

Floribunda

skarlaken en karmosyn
ametis
maanstraalpers
en pêrelwit
topaas en koraal
oranjebrons
perskepiek en gousblomgeel
smetloos
aromaties
malvasag
pryk jul gesond
gelukkig
tussen blinkgroen blaar

Parade

Parade

vroegoggend
glip ek kortpad
skuinsoor die parade
en systap verby
‘n opgedamde waterpoel
‘n grys straatduif skud sy vlerke droog
en pik-pik kopknikkend rond
aan kriesels op die teer
sy maat sit hoog en droog
bespiedend
bo-op
die Kroon se kop
voor die ou stadsaal
hang palmtakke roerloos
die smous se streepsak
word sistematiese oopgerol
uitgepak
opgestapel
onderklere net reg vir die mêrrem
hy kyk op en knik vir my
ja die lug is oop
hy’s hoopvol vandag
op ‘n persentasie profyt
dis skuins voor agt

Voorstedelike trein

Voorstedelike trein

ons klik-klik
dampend die daeraad in
die nagdou glip nog in koel straaltjies
teen die taai treinruit af
op stasies soek passasiers
skuiling teen die kilte
van die oggendwind
en as deure oopskuif
outomaties
vul sitplekke vinnig
en gesprekke begin vlot
ek merk onderlangs
vlugtige oogkontak
‘n afwykende kyk
stiltes en swye
stiltetye
passasiers sit
kouend aan brokkies ontbyt
rokend in rook verbode
gapend
slapend
lesend aan graffiti teen die duikwegmuur
waens glip verby
geel-en-grys
geel-en-grys geel-en-grys
langs die spoor strek die teerpad
blinknat
ligte flonker flouerig aan lamppale
in die mistigheid
sien ek dofweg
grasdak-kothuisies hurk
styf teenmekaar
sterk-stam Pierneef-denne
trotseer die wind
wat skuins oor waai
in Kuilsrivier-kanaal lê rommelgoed
soos vomeersel uitgespoeg
maar word genadiglik afgewissel
met vleie vol spierwit aronskelk
en ry op ry bot
jong wingerd reeds
‘n treinglipper uit die derdeklas
met kopdoek en sweetpakbroek
staan met plastieksak en druppende sambreel
naby aan die deur
reg om uit te spring
as die inspekteur in sy rigting kom
tussen stasies
merk ek
plakkerskamp op plakkerskamp
en bejammer die begrafnisbeeste
by Thornton lê die grafte ry op ry
kilometers aaneen
Christen Jood en Moslem
tog wel apart
gesegregeer
maar lankal stokstyf dood
tussen stasies
trek ek my serpie stywer
hoër oor my oë op
tyd om weg te sink
terug in myself
dis tyd
vir kommerkrale rol
‘n wolkbank hang vanmôre
laag teen die skuinste van Tafelberg
aan verwaarloosde skrootwerwe
herken ek Kaapstad
ook maar net nog ‘n stad
met Goliat-geleiers
vuil fabrieksterrein
‘n slagveld van gesneuwelde plastiek
vasgewaai en vermink
teen skerp palmtakspeke
en heinings van doringdraad
wat ironies genoeg
ander euwels
moet uithou
dan spoeg die trein ons uit op Kaapstad-stasie
en begin ons skarreling
soos vliegmiere
na die naaste lig
　
　
　
　
　
　
　
　
　

Padlangs

Padlangs

’n wolkedons omvou die Helderberg
vanoggend rosig sag
dan skielik skerpglinsterend
groet die môreson
as hy uitloer
oor die heuwel
langs die wynlandpad
pryk wynlandgoed trots
Stonewall
Sweetwell
Rust en Vreugd
Nietvoorbij
en
Avontuur
mý avontuur padlangs het begin
’n komposhoop
lê dampend in die môrekilte
en ry op ry gesnoeide wingerd
staan reeds hoopvol klaar
’n spogperd pronkgalop
en winkelpop-voëlverskrikkers
pas die aarbei op
langs die leivoor
in Eikestad
dartel bruin akkerblare
ritselend
om my enkels
in ’n laaste dans
en gly dan liggies leivoor langs
na êrens
vanaf die gewelhoek bespied
’n bosduif my skuinskop
koergroet
en skud sy vere reg
halfpad Helshoogte uit
teen die hang
ontdek ek die bessieplaas
jy word uitgenooi
daar’s bessies om te proe
kom kies en keur
ook druif
amandel en olyf
padlangs
suidwaarts terug
lê blou teen blou
’n sonnighelder Valsbaai
en Hottentotsholland sagkens toegevou
in ‘n wolkekraag
ai
ek tel my seëninge een vir een